அவதார் படத்திற்காக தமிழ்ப்படத்தின் கருவை அப்பட்டமாக உருவினார்களா

டைட்டானிக் படம் எடுத்த பிறகு பனிரெண்டு ஆண்டுகள் கழித்து அவதார் படம் எடுத்துள்ளார் ஜேம்ஸ் கேமரூன்.1994ம் ஆண்டே இந்த யோசனை அவருக்கு இருந்தாலும் அப்போது உள்ள தொழில் நுட்பங்களின் உதவி சாத்தியம் இல்லாத காரணத்தால் அதை கொஞ்சம் தள்ளி வைத்தார்.அது மாதிரி ஒரு படத்தை எடுக்க யாராவது முயற்சி செய்தார்களா என்று உலகம் முழுக்க வெளியான படங்களை பார்க்க தொடங்கினார். அதற்கே நேரம் சரியாக இருந்த காரணத்தால் எந்த படத்தையும் இயக்க ஒத்துக் கொள்ளவில்லை.டெர்மினேட்டர் மூன்றாம் பாகம் அவர் இயக்க மறுத்த காரணத்தால் படுதோல்வி அடைந்தது. ஆனால் அவர் தேடல் மட்டும் முடியவடையவில்லை.முடிவில் அவதார் படம் எடுப்பது சாத்தியம் என்று நிரூப்பித்து காட்டியது ஒரு தமிழ்ப்படம்.அதை பார்த்து அதிர்ச்சியில் உறைந்து போய் விட்டார்.மீள்வே கொஞ்ச காலம் பிடித்தது.ஆனால் இன்று தமிழ் நாட்டு மக்கள் அவதார் படத்தை வாயை பிளந்து பார்த்தாலும் இதனுடைய மூலப்படத்தை காலில் போட்டு மிதித்தார்கள்.அந்த படம் வெளியான நேரத்தில் அதை புரிந்து கொள்ளாமல் போய் விட்டார்கள்.

அப்படி அவர் பார்த்த படம் ரஜினிகாந்த் நடிப்பில் 2002ம் ஆண்டு வெளியான பாபா படம் தான்.இதில் இருந்த மைனஸ்களை(தெரியாமல் எழுதி விட்டேன்.உடனே ஓட்டுக் குத்த ஓட வேண்டாம்.) எல்லாம் எடுத்து விட்டு ப்ளஸாக மாற்றி எடுத்த படம் தான் அவதார்.

படத்தின் ஒற்றுமைகளும் வேற்றுமைகளும்..

பொறுப்பில்லாத பையன் வீட்டில் இருந்தால் அது ஒரு ஊனம் தான்.ஆனால் அவதாரில் நாயகனுக்கே ஊனம்.

இங்கு காதலை துறந்தவுடன் இமயமலைக்கு அழைத்து செல்லப்படுகிறார்.ஆனால் அங்கு கிரகத்திற்கு போனவுடன் நாயகனுக்கு ஒரு காதல் பிறக்கிறது.

இமயமலையில் மகாஅவதார் இருக்கிறார்.சம்ஸ்கிருதம் தான் மொழி.அதிலிருந்து அடித்த பெயர் தான் அவதார்.இங்கு புதிதாக ஒரு மொழி இருக்கிறது.எல்லோரும் சேர்ந்து வேண்டிக் கொண்டால் உயிர் பிழைத்து விடுகிறார்கள்.பாபாவில் ரஜினியை எரிக்க பார்ப்பார்கள் அவர் பிறகு தப்பி விடுவார்.

வேற்று கிரகத்திற்கு வித்தியாசம் காட்ட வேண்டுமே - வினோத மிருகங்கள்,பறக்கும் மலை எல்லாம் 3டியில் காட்டப்படுகிறது.

பாபாவில் அவர் பார்க்க முடியாத வெளிச்சத்தில் இருப்பார்.உடனே அதை மாற்றி கிருஷ்ணரில் நிறமான நீல நிறம் நவி கிரகத்தில் இருப்பவர்களுக்கு கொடுக்கப்படுகிறது.

இதுக்கு மேல சொல்ல ஒண்ணும் ஒரு ஹாலிவுட் படத்திற்கு ஒரு தமிழ்ப்படம் தான் முன்னுதாரணம் என்று தெரிந்து நான் பெருமகிழ்ச்சி அடைகிறேன்.

இப்படி நான் எழுதப் போறேன் என்று சொன்னவுடன் நிறைய நண்பர்கள் அதிர்ச்சியில் இருந்து இன்னும் மீளவில்லை.காரணம் பாபா படம் இன்னொரு முறை பார்த்து விட்டார்களோ என்று ஐயம் வருகிறது.

அதனால் அவதார் பார்க்கும் முன் பாபா பார்க்குமாறு கேட்டுக்கொள்ளப்படுகிறார்கள்.குசேலன் படத்தை வைத்து ஸ்டீபன் ஸ்பீல்பெர்க் படம் எடுக்க முயற்சி செய்கிறாரா என்று ஆராய்ந்து விட்டு சொல்கிறேன்.எதற்கும் குசேலன் படத்தையும் சேர்த்து பார்க்கவும்.பின்ன நான் பெற்ற இன்பம்....