மேதை ராமராஜன் - எதிவினைக்கு எகிறும் வினை

ராமராஜன் படங்களை எனக்கு பிடிக்காது என்று நான் போன பதிவில் சொல்லவேயில்லை.நான் சிரித்த காரணம் - அவர் "தொடர்ந்து" இருபத்தியாறு வெற்றிப் படங்கள் கொடுத்தேன் என்று சொன்னதற்கு தான்.இப்பவும் இந்த வார்த்தைகளைத் தட்டச்சு செய்யும் போது சிரிக்கிறேன்.அவர் நடித்த நாற்பத்தி மூன்று படங்களில் இருபத்தியாறு ஹிட் கொடுத்து இருக்கலாம்.ஆனால் தொடர்ந்து அவர் கொடுத்திருக்க முடியாது.உதாரணம் - என்னை விட்டுப் போகாதே,மில் தொழிலாளி,அன்புக்கட்டளை,தேடி வந்த ராசா இதெல்லாம் ஹிட்டா.அப்படி இது எல்லாம் வெற்றிப் படங்கள் என்றால் அஜித் நடித்த ஆழ்வார்,ஜி,ஜனா(இனிமே விஜய் பத்தி எழுதல.அசல் வருதாமே அவரை பத்தி எழுதுறேன். போன்ற படங்களும் அந்த வரிசையில் சேர்க்கலாம். சும்மா பகடி செய்தாலே எனக்கு விஜய்யை பிடிக்காது என்று தம்பி ராஜூ சொல்லி விட்டார்.) தொடர்ந்து என்ற வார்த்தையில் ராமராஜன் கொடுத்த அழுத்தம் தான் சிரிக்க காரணம். இதை நேற்று சொல்லாமல் விட்டது தான் நான் செய்த தவறு. காரணம் விஜய் மற்றும் சன் பிக்சர்ஸை தான் கேலி செய்கிறேன் என்று விட்டு விட்டேன்.உடனே தம்பி சரியாக வடையை கேட்ச் செய்து விட்டார்.

விஜய் எப்படி ரஜினி வழியை முயற்சி செய்கிறாரோ அதே போல ராமராஜனும் எம்.ஜி.ஆர் வழியை முயற்சி செய்தார். காணாமல் போனார். எம்.ஜி.ஆர் கூட "தொடர்ந்து" இருபத்தியாறு வெற்றி படங்கள் கொடுத்திருப்பாரா என்பது சந்தேகம் தான்.ஜாக்கி சான் உலகம் அறிந்த அவரும் "தொடர்ந்து" இந்த இருபத்தியாறு பட வெற்றிகளைத் தாண்டினாரா என்பது பெரிய கேள்விக்குறியே.

நான் நேற்று ராமராஜனை பகடி செய்யவில்லை.அவர் ஒரே மாதிரி நடித்து காணாமல் போய் விட்டார் என்ற ஆதங்கமே அது. பாடல்களும், தொய்வில்லாத திரைக்கதை அமைப்பும் தான் அவர் படத்தை தூக்கி நிறுத்தியது என்பதில் சந்தேகம் இல்லை.அதே பாணி தான் அவருக்கு பின்னால் குழியும் வெட்டியது.

நான் பகடி செய்தால் எப்படி செய்வேன் என்பதற்கு ஒரு சிறிய உதாரணம் இதோ.

ராமராஜனுக்கு தாய்குலங்கள் மற்றும் தங்கைகளிடன் தான் அமோக ஆதரவு.அவர் வளர்ந்து வந்த காலத்தில் கல்யாணம் ஆகாத பெண்கள் தென் மாவட்டங்களில் பீடி சுற்றும் தொழிலில் தான் அதிகம் ஈடுப்பட்டார்கள்.ராமராஜனை ஒரு அண்ணனாக தான் பார்ப்பார்கள். அப்போதும் கிராமத்து இளந்தாரிகள் அதிகம் ரஜினி ரசிகர்களாகத் தான் இருந்தார்கள். காரணம் ராமராஜன் திரையில் காட்டிய புனிதப் பிம்பம். எம்.ஜி.ஆர் பாணியில் குடிக்க மாட்டார்,புகைக்க மாட்டார்,பெண்களை ஆண்களுக்கு சார்ந்து தான் இருக்க வேண்டும் என்று சொல்லாமல் சொல்வார். கேலி செய்யும் பெண்களுக்கு அவர் பதிலடி கொடுக்கும் விதத்தில் தெரியும். குடித்து விட்டு வரும் இளந்தார்களிடம் எனக்கு ராமராஜன் மாதிரி ஒரு பிள்ளை இல்லையே என்று சொல்லி வாங்கி கட்டியவர்கள் தான் அதிகம்.

ராமராஜன் படங்கள் ஆபத்தில்லாதவை என்று சொல்வதை விட ஆபத்து கண்ணுக்கு தெரியாதவை.எப்படி என்றால் வில்லன் பெண் பித்து பிடித்து அலைவான்.வில்லன் கற்பழிக்க முயற்சி செய்யும் பெண் சுமாராக இருந்தால் அவள் தங்கை.சூப்பராக இருந்தால் நாயகி. நாயகனுக்கு உதவும் நல்லவன் முதலில் ராமராஜனோடு மோதுவான்.பிறகு உதவுவான்.ஆனால் அவனுக்கு குடிப் பழக்கம் உண்டு. இப்படி அவர் மட்டும் உத்தமராய் இருப்பாராம்.சுற்றி இருப்பவர்கள் மட்டும் அயோக்கியர்களாம். திஸ் அப்ரோச் இஸ் நோன் அஸ் காரக்டர் அஸாசினேஷன்.(கோபப்படும் போது மட்டும் தான் ஆங்கிலம் வருது.)

தம்பி சொல்லியிருக்கிறார். அந்த அபிமானம் அவரை எம்.பி யாக்கியது என்று.அந்த அபிமானம் குறைந்த காரணத்தால் தான் அடுத்த தேர்தலில் அவர் செருப்பை வீசினார்கள். மக்கள் நாயகன் என்று கட் அவுட் இருந்தது - பத்து ஆண்டுகளுக்கு முன் இப்போது அந்த இடத்தில் ஒரு கம்பி தான் இருக்கிறது.(உதாரணம் சாத்தான் குளம் பக்கத்தில் இருக்கும் இட்டமொழி என்ற ஊரில் ஐந்து ஆண்டுகளுக்கு முன் பார்த்தது - வெறும் கம்பி தான் மிச்சம்.).அவர் தொடர்ந்து வெற்றிப் படங்கள் குடுத்திருந்தால் செருப்பு வருமா சொல்லுங்கள் தம்பி.

டவுசர்,கலர் சட்டை என்று போடாமல் விட்டு விட்டேன்.இன்றும் பளபள சட்டைப் போட்டால் "என்ன ராமராஜன் டிரஸ்ஸா.." என்று கேட்பார்கள். அது ஒன்று தான் இன்றும் அவரின் வெற்றியை நினைவுப்படுத்துகிறது.

அண்ணன் துபாய் ராஜா சொல்லியிருந்தார் - எந்த நாயகனும் டவுசர் அணிந்து நடிக்கவில்லை. சிவாஜி நடித்து இருக்கிறார் ஞானஒளி. ரஜினி - அதிசியப் பிறவி.ராமராஜன் அந்த படத்திலாவது மாடு பிடிக்க டவுசர் போடுவார்.சரி ஒத்துக் கொள்கிறேன்.பட்டங்கள் பறக்கட்டும் படத்தில் மாடு கிடையாது.நகரத்தில் நடக்கும் கதை. அதிலும் டவுசரில் வருவார்.

என் குரு நாதர் போல் பரபரப்பு கூட்டுவதற்காக எழுதியிருக்கிறேன் என்று சொன்னார். பரபரப்பாக எழுத விஷயங்கள் நிறைய இருக்கும் போது இதை வைத்து பரபரப்பு கூட்ட எந்த அவசியமும் இல்லை.

இளையராஜா கிராமத்தில் காலுன்ற ராமராஜன் படங்கள் பெரிதும் உதவியது என்று சொன்னார். இதுக்கு சிரிக்காமல் எதுக்கும் சிரிக்க முடியாது. அன்னக்கிளி,பதினாறு வயதினிலே படங்களின் பாடல்கள் கிராமப்புறங்களில் பட்டையைக் கிளப்பிய போது ராமராஜன் மதுரை மேலூரில் டவுசர் பையான இருந்திருப்பார். முடியலப்"பா".

அடுத்து கவுண்டமணி செந்தில் ஜோடிக்கு அடித்தளம் ராமராஜன் படங்கள் தான் காரணமாம். அப்போ இந்த படங்கள் வைதேகி காத்திருந்தாள் (மேண்டில் காமெடி),உதய கீதம் (முதலில் இருவரும் சேர்ந்த படம்),கீதாஞ்சலி (குதிரை ஓட்டுபவர்களாக வருவார்கள்) இந்த படங்கள் எல்லாம் வரும் போது ராமராஜன் பட்டங்கள் பறக்கட்டும் படத்தில் டவுசரில் நடித்திருப்பார்.இல்லை சொங்கி மாப்பிள்ளை ரவுடிகளிடம் மாட்டிக் கொண்டு விழிப்பவராக நடித்திருப்பார்.(படம் சூரக்கோட்டை சிங்கக்குட்டி பிரபு நடித்தது)

"மறைமுகமாக ராமராஜன் படங்கள் பெரும்பாலும் நிலபிரபுத்துவ அதிகாரத்தைக் காட்டின.." - இந்த மாதிரியான பித்தளை வரிகளை உதித்தது தம்பி "டக்"-"அவுட்" ராஜூ. அதற்கு குழலி பின்னூட்டத்தில் பதில் சொல்லி இருக்கிறார். சுகுணாவின் பதிவை படிக்கவும். இல்லை வைர வரிகள் உதிர்க்க தம்பி இந்த வயதிலாவது பாலகுமாரனின் பழைய நாவல்களைப் படிக்கலாம்.

ராமராஜனுக்கு ஜாதி ரீதியாக சப்போர்ட் இல்லையாம். என்ன கொடுமை. அவர் படத்தில் நடிக்கும் போது இருந்தது. அவர் மாதிரி புனித பிம்பம் காட்டாமல் பீடிப் பிடித்து கொண்டு,சரக்கடித்தது போல் நடித்த சரத்குமாருக்கு மாறியது.(படங்கள் - ஆதித்யன்,ஊர் காவவன்.)

ரஜினி படங்கள் வெளியிட தயங்குவாரா - டீ.ஆர் படங்களும்,ரஜினி படங்களும் நிறைய முறை நேருக்கு நேர் மோதியுள்ளது.எதிவினை எழுதும் போது சரியான புள்ளி விவரங்களுடன் எழுதவும்.அதற்கு பேராண்மை மாதிரியான திருடியப் படங்களைப் பார்த்த உடன் மறந்து விடவும். (ஜன நாதனுக்கு பிடித்த நடிகரும் ராமராஜன் தான்)

டிஸ்கி :

மேதை படம் வெளியாகும் போது நேற்று ராமராஜனுக்கு குடுத்த ஆதரவை நீங்கள் கண்டிப்பாக குடுக்க வேண்டும் என்று கேட்டுக் கொள்கிறேன். விஜய் படம் பார்க்க செலவளித்த காசை அந்த படத்திற்கும் செலவளியுங்கள். மதுர தம்பி அந்த படத்தை தொலைக்காட்சியில் வரும் வரை காத்திருக்காமல் தியேட்டரில் கண்டுக் களிக்குமாறு கேட்டுக் கொள்ளப்படுகிறார்.தயவு செய்து மேதை படத்தை வெற்றி பெற செய்யுங்கள்.